ఆంధ్రప్రదేశ్‌లో రేషన్ బియ్యం అక్రమ రవాణా భారీ మాఫియా చర్యగా మారిందని APCC చీఫ్ వైఎస్ షర్మిలా రెడ్డి తీవ్ర విమర్శలు చేశారు. ఇది జాతీయ స్థాయి కుంభకోణమని, పేదల కోసం కేటాయించిన 48 వేల కోట్ల రూపాయల బియ్యాన్ని దోపిడీ చేశారని ఆమె ఆరోపించారు.
రేషన్ బియ్యం స్మగ్లింగ్ వెనుక రాజకీయ నేతల ప్రమేయం, కింద స్థాయి నుండి ఉన్నత స్థాయి అధికారుల వరకు కొందరి అవినీతి ఈ దోపిడీలో భాగమని షర్మిలా పేర్కొన్నారు. ఈ అక్రమ రవాణాకు నిఘా వ్యవస్థ పూర్తిగా విఫలమవ్వడంతో రాష్ట్రంలో అవినీతి ప్రజలపట్ల అన్యాయం చేస్తోంది. గడచిన మూడేళ్లలో ఆంధ్రప్రదేశ్ పోర్టుల ద్వారా 2 కోట్ల టన్నుల రేషన్ బియ్యం అక్రమంగా రవాణా చేసారని ఆమె పేర్కొన్నారు. చెక్‌పోస్టుల పనితీరును దృష్టిలో ఉంచుకుంటే, ఈ స్థాయి అవినీతి ఎలా కొనసాగిందో అర్థమవుతుందన్నారు. బియ్యం స్మగ్లింగ్ వెనుక ఉన్న అసలు దోషులు ఎవరు? రూ.48 వేల కోట్లను ఎవరు దోచుకున్నారు? అనేది నిగ్గు తేల్చాల్సిన సమయం ఆసన్నమైందని షర్మిలా చెప్పారు.
రేషన్ బియ్యం స్మగ్లింగ్‌కు సంబంధించి రాష్ట్ర ప్రభుత్వం వెంటనే ప్రత్యేక దర్యాప్తు కమిటీ ఏర్పాటు చేయాలని, లేదంటే సీబీఐ విచారణ చేపట్టాలని ఆమె డిమాండ్ చేశారు. ఈ సమస్యపై బోట్లు వేసి హడావిడి చేయడం కాదు, నిజాలను బయటపెట్టడం అవసరమని షర్మిలా చెప్పారు.
ఆంధ్రప్రదేశ్ రాష్ట్రం ధాన్యాగారానికి నిలయం, ప్రపంచానికి అన్నం పెట్టే ప్రాంతం. కానీ, ఈ రోజు ఆ రాష్ట్రం రేషన్ బియ్యం మాఫియాకు అడ్డాగా మారింది. రైతులు కష్టపడుతున్నా, వారికి కన్నీళ్లు మాత్రమే మిగిలితే, బియ్యం మాఫియాలకు కాసులు దక్కడం రాష్ట్ర దురవస్థగా ఆమె పేర్కొన్నారు.
ఈ దోపిడీని అరికట్టడానికి, రాష్ట్రంలో కూటమి ప్రభుత్వం చర్యలు తీసుకోవాలని, రేషన్ బియ్యం దోపిడీ వెనుక ఉన్న ప్రతి పక్షాన్ని బహిర్గతం చేసి, ప్రజల న్యాయం జరగాలని షర్మిలా డిమాండ్ చేశారు.
