ఆంధ్రప్రదేశ్ ముఖ్యమంత్రి చంద్రబాబు నాయుడు రాష్ట్ర సచివాలయంలో నిర్వహించిన కేబినెట్ సమావేశం విజయవంతంగా ముగిసింది. ఈ సమావేశంలో పలు కీలక అంశాలపై చర్చించి, ముఖ్యమైన నిర్ణయాలు తీసుకున్నారు.
కేబినెట్ అమరావతి అభివృద్ధి కోసం రూ. 2,733 కోట్ల వ్యయంతో చేపట్టబోయే పనులకు ఆమోదం తెలిపింది. 44వ కేబినెట్ సమావేశంలో నిర్ణయించిన రెండు ప్రధాన పనులను కూడా అమలు చేయాలని నిర్ణయించారు. ఈ కార్యక్రమాలు అమరావతి ప్రాంత అభివృద్ధికి దోహదపడతాయని అధికారులు తెలిపారు.భవన నిర్మాణ అనుమతులు మరియు లేఔట్ల హక్కులను మున్సిపాలిటీలకు బదిలీ చేసే పట్టణ శాసన సవరణ ఆర్డినెన్స్కు ఆమోదం లభించగా. ఈ సవరణ ద్వారా పట్టణ అభివృద్ధి మరింత సులభతరంగా సాగుతుందని ప్రభుత్వం భావిస్తోంది.
పిఠాపురం ప్రాంత అభివృద్ధి అధికారం పరిధిలో 19 కొత్త పదవులను సృష్టించడానికి కేబినెట్ ఆమోదం తెలిపింది. ఈ నిర్ణయం ఆ ప్రాంత అభివృద్ధి ప్రణాళికలను మరింత వేగవంతం చేయడానికి ఉపయుక్తంగా మారనుంది.రామాయపట్నంలో బీపీసీఎల్ రిఫైనరీ మరియు కాకినాడలో గ్రీన్ అమోనియా ప్లాంట్ ఏర్పాటుకు సంబంధించి చర్చలు జరిగాయి.
నంద్యాల, కడప, కర్నూలు జిల్లాల్లో గాలి మరియు సౌర విద్యుత్ ప్లాంట్ల ఏర్పాటుకు కేబినెట్ ఆమోదం తెలిపింది. పునరుత్పత్తి విద్యుత్ ప్రాజెక్టులు నవీన విద్యుత్ వనరుల వినియోగానికి తోడ్పడటమే కాకుండా, పర్యావరణానికి మేలు చేస్తాయని నిపుణులు అభిప్రాయపడ్డారు.
చిత్తూరు జిల్లాలో హోం డిపార్ట్మెంట్ ఐఆర్ బెటాలియన్ ఏర్పాటుకు స్థలం కేటాయించాలనే అంశంపై కేబినెట్ సుదీర్ఘ చర్చ చేసింది. ఈ నిర్ణయం ప్రాంతీయ భద్రతా వ్యవస్థను బలోపేతం చేయడంలో కీలక పాత్ర పోషించనుంది.ఈ సమావేశంలో తీసుకున్న నిర్ణయాలు రాష్ట్ర అభివృద్ధి, ప్రజా సంక్షేమం కోసం అమలు చేయాలని ముఖ్యమంత్రి చంద్రబాబు నాయుడు తెలిపారు.
