ఆంధ్రప్రదేశ్‌లో తుపాను ప్రభావం కారణంగా ప్రధానమంత్రి నరేంద్ర మోదీ ఈ నెల 29న జరగాల్సిన విశాఖపట్నం పర్యటనను రద్దు చేశారు. ఈ విషయాన్ని ప్రధాని కార్యాలయం (పీఎంవో) అధికారికంగా ప్రకటించింది.
మోదీ పర్యటన నేపథ్యంలో విశాఖపట్నంలోని ఆంధ్రా యూనివర్సిటీ ఇంజినీరింగ్ కళాశాల మైదానంలో లక్ష మందితో భారీ బహిరంగ సభకు ఏర్పాట్లు పూర్తయిన విషయం తెలిసిందే.
ఈ పర్యటనలో ప్రధానమంత్రి పలు కీలక కార్యక్రమాల్లో పాల్గొనాల్సి ఉంది. అనకాపల్లి జిల్లా పూడిమడకలోని ఎన్టీపీసీ గ్రీన్ హైడ్రోజన్ హబ్ శంకుస్థాపన, రైల్వే ప్రాజెక్టుల ప్రారంభం, జాతీయ రహదారులను జాతికి అంకితం చేయడం వంటి కార్యక్రమాలు ఇందులో భాగంగా ఉండేవి.
తుపాను హెచ్చరికల నేపథ్యంలో ప్రజల భద్రతను ప్రాధాన్యతగా భావించి పర్యటనను రద్దు చేయాల్సి వచ్చిందని పీఎంవో అధికారులు స్పష్టం చేశారు. పర్యటనకు సంబంధించిన తదుపరి తేదీలను త్వరలో ప్రకటించే అవకాశం ఉందని అంచనా.
