YSR life time achievement awards
విజయవాడ ఏ కన్వెన్షన్‌ సెంటర్‌లో వైఎస్సార్ లైఫ్‌టైమ్‌ అచీవ్మెంట్, వైఎస్సార్ అచీవ్‌ మెంట్‌ –2022 అవార్డుల ప్రదానోత్సవం ఘనంగా జరిగింది. వరుసగా రెండో ఏడాది జరిగిన ఈ అవార్డుల ప్రదానోత్సవానికి ముఖ్య అతిథిగా గవర్నర్ శ్రీ బిశ్వభూషణ్ హరిచందన్, విశిష్ట అతిథిగా ముఖ్యమంత్రి జగన్, ఆత్మీయ అతిథిగా శ్రీమతి వైఎస్ విజయమ్మ హాజరయ్యారు. వివిధ రంగాల్లో విశేష కృషి చేసిన 35 మందికి అవార్డులు అందజేశారు గవర్నర్ బిశ్వభూషణ్ హరిచందన్.
వ్యవసాయం, కళలు, సంస్కృతి, సాహిత్యం, మహిళా శిశు సాధికారత, విద్య, జర్నలిజం, వైద్యం, పరిశ్రమలు వంటి రంగాలలో విశేష కృషి చేసిన వ్యక్తులు, సంస్ధలకు 20 వైఎస్సార్ లైఫ్‌టైమ్‌ అచీవ్మెంట్ అవార్డులు, 10 వైఎస్సార్ అచీవ్‌ మెంట్‌ అవార్డులు అందజేశారు.
ఈ సందర్భంగా సీఎం జగన్ మాట్లాడుతూ.. సామాన్యుల్లో ఉన్న అసామాన్యులకు, అసామాన్య సేవలందిస్తున్న మానవతా మూర్తులకు వరుసగా రెండో ఏడాది రాష్ట్ర ప్రభుత్వం తరపున ఈ (వైఎస్సార్ అచీవ్మెంట్, వైఎస్సార్ లైఫ్‌ టైమ్‌ అచీవ్మెంట్) అత్యున్నత అవార్డులను ప్రదానం చేస్తున్నట్లు చెప్పారు. ఈ అవార్డులు తమ శ్రమతో, స్వేదంతో మనరాష్ట్ర చరిత్రను గొప్పగా లిఖిస్తున్న రైతన్నలకు ఏ రాష్ట్రంలోనూ లేని విధంగా ఒక్క ఆంధ్రప్రదేశ్ లోనే ఇస్తున్నట్లు వివరించారు. ఈ అవార్డులు మన సంస్కృతి, సాంప్రదాయాలకు దశాబ్దాలుగా వారధులుగా ఉన్నవారికి ఇస్తున్నట్లు పేర్కొన్నారు.
“ఈ అవార్డులు మన మహిళా రక్షణకు నిరంతరం పాటుపడే రక్షణ సారధులకు, వెనుకబాటు మీద, అణిచివేత మీద, పెత్తందారీ పోకడల మీద దండయాత్ర చేస్తున్న సామాజిక ఉద్యమకారులకు, భిన్నమైన కళాలకు, గళాలకు, పాత్రికేయులకు, మన గడ్డమీద పుట్టి, వైద్య ఆరోగ్యరంగంలో మనిషి ప్రాణాలు నిలబెట్టడంలో అంతర్జాతీయ కీర్తి గడించిన మహామహులకు, అంతర్జాతీయంగా కీర్తి గడించిన మన పారిశ్రామిక దిగ్గజాలకు ఇస్తున్నాం” – సీఎం జగన్
వైఎస్సార్ ముఖ్యమంత్రిగా ఉన్న 5 ఏళ్ల 3 నెలల కాలంలో తాను ఆచరించి చూపిన రైతు పక్షపాత, మహిళా పక్షపాత, నిరుపేద పక్షపాత విధానాలకు, సామాజిక న్యాయానికి, ప్రాంతీయ న్యాయానికి, వైద్య రంగంలో తీసుకొచ్చిన విప్లవానికి, మనదైన తెలుగుదనానికి, మన కళలు, సాంప్రదాయాలకు, మన శ్రమకు, పరిశ్రమకు ఆయనను గుర్తు చేసుకుంటూ ఈ అవార్డులు ఇస్తున్నట్లు జగన్ చెప్పారు. ఈ రోజు అత్యంత ప్రతిష్టాత్మకమైన ఈ అవార్డులు అందుకుంటున్న ప్రతి ఒక్కరికీ మరోసారి తన తరపున, రాష్ట్ర ప్రభుత్వం తరపున, రాష్ట్ర ప్రజలందరి తరపున హృదయపూర్వకంగా అభినందనలు తెలియజేస్తున్నట్లు పేర్కొన్నారు.
